cabycedra gerna

ni'o so'e cmima be la roljbogu'e cu se bangu lo jbobau poi se gerna lo cabycedra farvi .i ti noi .uitki papri cu velcki su'o fadni ke gerna pagbu

jecu

ni'o lo'u jecu le'u cmene la za'e jbojecu ku noi jbobau bankle gi'e te valsi fi lo sampu se stura poi basti zo gi'e .e zo .e .e zo je .e zo zi'e .e zo ge li'o

.i la selpa'i cu finti do'e zoi ky. https://solpahi.wordpress.com/2016/09/20/a-simpler-connective-system/ .ky

.i la jbojecu zo'u lo cmavo so'omei be la'e zo JA cu kaicfa lo ka se jinzi lo ka te jorne so'a da so'a de .i ra'u plixau lo nu te jorne lo brirebla lo brirebla .i mu'a co'e lo'u ti cu broda je cu brode le'u noi jai krasi lo bi'unai cmene

tcekitau

ni'o la tcekitau cu jbobaukle gi'e jai te simbasti su'o tordu je jai tolcafne cmavo su'o mlicla je jai tcecafne cmavo .i mu'a lo se jbobau be la tcekitau cu te smuni zo ki lo ca'irselzau smuni be zo ke'a .i co'e si'a zo du zo du'u .i zo tau zo tu'a .i zo ce zo ce'u

.i lo'u lo jbobau poi lo cmavo be fo ki cu zmadu fi lo ka ce tordu le'u cu zilfanva la tcekitau lo ca'irselzau lojbo lu lo jbobau poi lo cmavo be fo ke'a cu zmadu fi lo ka ce'u tordu

jboponei

ni'o la jboponei cu jbobaukle noi zo po fa'u zo nei cu smudu'i lo'u lo su'u le'u fa'u lo'u kei ku le'u vu'o ne bau lo ca'irselzau lojbo

.i mu'a co'e lo'u mi gleki po do djuno po vajni fa po crezenzu'e le'u .i zabna lo ka jdika tu'a lo simsa be lo'u lo nu le'u noi se ricfu lo'e lojbo jufra

.ajbo

ni'o la .ajbo cu jbobaukle noi jai se sarcu la jbojecu gi'e bau ke'a zo .a fa'u zo .e fa'u zo .o fa'u zo .u cu se smuni lo ca'irselzau smuni be lo'u .i pau le'u fa'u lo'u .i je le'u fa'u lo'u .i ko'oi le'u fa'u lo'u .i ku'i le'u

.i se ki'u bo bau la jbojecu cu zifre lo ka ce'u te se smuni lo cnino zo .a mu'a noi zo ja ca'a basti ke'a .i su'o jbopre cu jdice tu'a lo nu smigau ra zo .i